Алматы. 24 қыркүйек. 7kun.kz – Облыс орталығында алғаш рет құрғақ құрылыс қоспаларын шығаратын «Сана» Халықаралық жекеменшік корпорациясы» ЖШС ірі зауыт іске қосылды, деп хабарлайды Алматы облысы Кәсіпкерлер палатасының баспасөз қызметі.

Кәсіпорынды бизнес саласында 25 жылдан астам тәжірибесі бар кәсіпкер Сайлау Ахметжанов ашқан.

Кәсіпорын күніне 50 тонна өнім шығарады. Алты түрлі тауар - цемент сылауы, гипс сылауы, кафельді желім, құйма еден, теңдестіруші тегістеуші, көмбе тегістеуші «Sanamix» брендімен сатылымға шығарылуда. Отандық өнімнің жоғары сапасын неміс және швейцарлық технология қамтамасыз етеді. Өнімнің тағы бір ерекшелігі оның бағасында. Тауар құны нарықтық бағадан төмен.

«Қазіргі өндіріс көлемі алдағы уақытта өңірімізді құрғақ құрылыс қоспаларымен қамтамасыз етуге мүмкіндік береді. Сапасы жағынан «Alinex» немесе «Rotband» сияқты танымал брендтерден еш кем емес. «Sanamix» олармен тең дәрежеде бәсекелесе алады. Сонымен бірге, біздің өнім 700-800 теңгеге арзан», - деді «Сана» ХЖК» басшысы Сайлау Ахметжанов.

Кәсіпкердің сөзінше, өндіріс орнында 12 адам жұмыс істейді.

Қазіргі таңда кәсіпорын болашақ серіктестерімен тауарды өткізу бойынша келіссөздер жүргізу үстінде. Алдағы уақытта «Sanamix» отандық бренді құрылыс дүкендерінің сөресінен орын табады.