Қазақстан Президенті Қасым-Жомарт Тоқаев ел тұрғындарын Конституция күнімен құттықтады, деп хабарлады Ақорда.

Мемлекет басшысы өз құттықтауында Ата заңның ел тарихындағы рөліне тоқталды. Ол осыдан 30 жыл бұрын бүкілхалықтық референдумда қабылданған Конституция тәуелсіз Қазақстанның басты тірегіне айналғанын атап өтті.

«Құрметті отандастар! Баршаңызды Конституция күнімен құттықтаймын! 30 жыл бұрын халқымыз тарихи таңдау жасап, Ата заңды қабылдады. Конституция Қазақстан Республикасы тәуелсіздігінің әрі қазақ мемлекеттілігінің мызғымас тұғыры болды. Онда ұлтымыздың бүгіні мен ертеңін айқындайтын құндылықтар мен қағидаттар айқын көрініс тапты. Ата заң – ел азаматтарының құқықтарын тең қорғайтын, әлеуметтік мемлекет ретінде құқықтық іргетасымызды бекіткен құжат. Сондай-ақ ол қоғамдық келісім мен тұрақтылықтың негізгі кепілі саналады. Әр саладағы жетістіктеріміздің бастауында осы Конституция тұр», — деді Президент.

Тоқаевтың айтуынша, үш жыл бұрын ел дамуының жаңа кезеңіне сәйкес ауқымды конституциялық реформа жүзеге асырылды. Оның басты нәтижесі – «Күшті Президент – ықпалды Парламент – есеп беретін Үкімет» қағидаты негізінде саяси жүйенің жаңаруы. Бұл реформаларда адам құқықтарын қорғау мен заң үстемдігін қамтамасыз етуге айрықша мән берілді.

Президент сонымен бірге Венеция комиссиясы мен бірқатар халықаралық ұйымдардың, сондай-ақ шетелдік сарапшылардың Қазақстандағы конституциялық өзгерістерге оң баға бергенін айтты.

«Әділетті, Таза, Қуатты және Қауіпсіз Қазақстан құру үшін әрбір азамат Конституцияны құрметтеп, оның нормаларын қатаң сақтауы қажет. Ата заң аясында барша қазақстандыққа Отанымызды өркендету жолында жасампаз еңбек етуге барлық мүмкіндік жасалған. Халқымызға денсаулық пен бақ-береке тілеймін», – деді Мемлекет басшысы.