Алдағы он жылда жасанды интеллектіні кеңінен енгізу салдарынан Қазақстанда 300-400 мың жұмыс орны қысқаруы мүмкін.

Мұндай болжамды Қазақстан Республикасы Еңбек және халықты әлеуметтік қорғау министрлігі жасады. Бұл туралы ведомствоның вице-министрі Ербол Тұяқбаев мәлімдеді.

Оның айтуынша, автоматтандыру мен жасанды интеллект ең алдымен бухгалтер, заңгер секілді мамандықтарға әсер етуі ықтимал. Еңбек ресурстарын дамыту орталығы жүргізген талдау бойынша, елде шамамен 300-400 мың жұмыс орны қысқаруы мүмкін.

Сонымен қатар министрлік жаңа сұранысқа ие мамандықтарға бейімдеу жұмыстарын жүргізіп жатқанын хабарлады.

«Жыл басынан бері 186 мың адамды қайта даярладық», – деді вице-министр.

Бұған дейін Қасым-Жомарт Тоқаев «Қазақстан Республикасының орта білім беру жүйесіне жасанды интеллектіні енгізу жөніндегі шаралар туралы» жарлыққа қол қойған еді.

Құжат білім беру жүйесін цифрлық дәуір талаптарына бейімдеуге бағытталған.