2026 жылы елімізде жалпы қуаты 2,6 ГВт болатын жаңа электр қуат көздері пайдалануға беріледі.

Оның ішінде жаңартылатын энергия көздері (ЖЭК) нысандарының үлесі 173 МВт-ты құрайды. Бұл туралы Энергетика министрлігінің мәліметінде айтылды.

Негізгі жобалардың бірі – «Текелі энергия кешені» ЖШС. Кәсіпорын 2026 жылдың маусым айында қуаты 17 МВт болатын үш жою қазандығы мен бу турбинасын іске қосуды жоспарлап отыр.

Сондай-ақ «Атырау ЖЭО» ЖШС 2026 жылдың желтоқсанында №11 турбоагрегат пен №15 қазандықты пайдалануға береді. Олардың жалпы қуаты – 59,6 МВт.

2026 жылы бірқатар өңірде ірі бу-газды қондырғылар да іске қосылады. Қызылорда облысында тамыз айында қуаты 240 МВт болатын бу-газды қондырғы пайдалануға берілсе, Түркістан облысында желтоқсан айында қуаты 1000 МВт-тық нысан іске қосылады. Алматы қаласында ЖЭО-2-де 557 МВт және ЖЭО-3-те 544 МВт қуаттылықтағы бу-газды қондырғыларды 2026 жылдың соңына дейін пайдалануға беру жоспарланған.

Сонымен қатар, 2026 жылдың желтоқсанында жалпы қуаты 173 МВт болатын жаңартылатын энергия көздері нысандары іске қосылады.

Мамандардың болжамынша, 2027 жылдың бірінші тоқсанына қарай Қазақстан электр энергиясымен толық қамтамасыз етіліп, энергия тапшылығы бар елдер қатарынан шығады.