Ұлттық Банктің келтірген статистикалық мәліметіне сәйкес, экономикадағы несиелер көлемі 2024 жылдың 1 маусымнан бастап 22,2%-ға ұлғайып 2025 жылғы 1 маусымдағы жағдай бойынша 44,5 трлн теңгені құрады.

Қарыз алушылардың санаттары бойынша 20,4 трлн теңге немесе кредиттердің жиынтық көлемінің 46,0%-ы бизнес кредиттеріне (бизнес мақсаттарына кредиттер алған қаржылық емес заңды тұлғалар мен дара кәсіпкерлер), 24,0 трлн теңге немесе 54,0% – халыққа берілетін кредиттер.

Ұлттық валютадағы кредиттер көлемі 40,2 трлн теңгені (90,4%), шетел валютасында – 4,3 трлн теңгені (9,6%) құрады. Банк секторының кредиттері кредиттердің жалпы көлемінің 85,5%-ын құрайды.

Айта кетейік, халыққа теңге түрінде берілген несие өсімі 1,7%, шетел валютасындағысы 2,41% көлемінде едәуір ұлғайды. Алайда, халыққа берілетін кредиттер негізінен теңгемен шоғырланғанын, шетел валютасындағы қарыздардың үлесі небәрі 0,01%-ды (2,3 млрд теңге) құрайтынын нақтылай кетелік.

Ал бизнестегі жағдай басқалай. Шетел валютасында бизнеске берілген несие кредиттер портфельінің 20,9% -ын құрайды және бір айда олардың көлемі 3,4%-ға өсті. Теңге түріндегісі 1,2% өсіп, 16,2 трлн теңгеге жетті.

Банк секторының несиелері үлесі кредиттердің жалпы көлемінің 85,6%-дан 85,5%-ға дейін аздап төмендеді. Керісінше, бұл реттегі көлем бір айда 1,5%-ға немесе 38 трлн теңгеге дейін ұлғайды.

Ипотекалық ұйымдардың несиелері алдыңғы айлардағыдай біртіндеп қысқаруда. Бір айда 0,4%-ға немесе 269,8 млрд теңгеге дейін төмендеді. Қаңтар айынан бастап олардың көлемі 2,4%-ға азайды (276,5 трлн теңгеден).

Микроқаржы қызметін жүзеге асыратын ұйымдардың кредиттері 1,5%-ға, яғни 2,99 трлн теңгеге дейін өсті. Квазимемлекеттік сектордың басқа субъектілерінің кредиттері 3,6%-ға немесе 3,2 трлн теңгеге дейін ұлғайды.