Еуропа прокуратурасы Грекиядағы Пирей портында кедендегі ірі парақорлық және контрабандаға қатысты ауқымды тергеу бастады. Бұл туралы euronews пен АΠΕ-ΜΠΕ агенттіктері хабарлайды.

Грек полициясы кедендік құжаттарды рәсімдеу кезінде алаяқтық, контрабанда, пара беру және басқа да ауыр қылмыстарға байланысты ірі операция жүргізіп, бірнеше адамды ұстады. Тергеу шаралары Италия, Испания, Болгария, Франция және Бельгияда да жалғасуда.

Еуропалық прокуратураның бастамасымен Грекияның Ішкі істер министрлігі мен Қылмыстық іздестіру департаменті бұл қылмыстарды анықтау үшін арнайы іс-шаралар ұйымдастырды. Пирей портындағы кеден бекетінде арнайы рейд жүргізілді. Сонымен қатар, 20 кеден қызметкерінің үйлерінде және кеңселерінде тінту жұмыстары өткізілді. Қазірге дейін 8 адам ұсталып, олардың үшеуіне заңсыз қару сақтау айыбы тағылды. Қалған бес адамға бірнеше ауыр қылмысқа қатысты айыптар қойылды.

Тергеу мәліметтеріне сәйкес, күдіктілер пара алып, кедендік тексеру кезінде нақты контейнердегі тауарлардан өзгеше құжаттар толтырып, контрабандалық жүктерді өткізіп отырған. Осы қылмыстардың салдарынан мемлекет пен Еуропалық Одақ 250 миллион еуродан астам қаржылық шығынға ұшырады.

Қазіргі уақытта тергеу аясында 4,5 миллион еуро көлеміндегі қаржы тәркіленген. Тінту жұмыстары күшейтіліп, күдіктілердің мекенжайлары мен жұмыс орындарында іздестіру шаралары жалғасуда.

Бұл іс Еуропалық алаяқтықпен күрес бюросы (OLAF) ұсынған ақпарат негізінде қозғалды. Тергеу ауқымды және ол салық алаяқтықтары, қылмыстық ұйым құру, лауазымды тұлғаларды паралау және ақша жуу сияқты бірнеше ауыр қылмыстарды қамтиды.

Еуропалық прокуратура мен құқық қорғау органдары осы ірі парақорлық пен контрабанда схемасын толығымен жоюға бағытталған жұмыстарын жалғастыруда. Қазіргі кезде тағы да жаңа деректер мен күдіктілер анықталып жатыр.