Францияның Эвиан-ле-Бен қаласында өтіп жатқан «Үлкен жетілік» (G7) саммитінде қатерлі ісікпен күрес, Эбола індетінің таралуына қарсы іс-қимыл және халықаралық серіктестікті нығайту бағытындағы үш маңызды бірлескен мәлімдеме қабылданды.

Саммиттің 16 маусымдағы отырыстарында Украинадағы жағдай, Еуропаның қауіпсіздігі, Таяу Шығыстағы тұрақтылық және жаңа халықаралық серіктестік тетіктерін дамыту мәселелері кеңінен талқыланды.

G7 елдерінің көшбасшылары қатерлі ісікке қарсы күресті күшейту қажеттігін атап өтті. Саммит қорытындысы бойынша жарияланған құжатта бұл дерт жыл сайын әлем бойынша шамамен 10 миллион адамның өмірін жалмайтыны айтылған. Сарапшылардың болжамынша, 2050 жылға қарай қатерлі ісікке шалдығу жағдайлары 80 пайызға дейін артуы мүмкін. Осыған байланысты тараптар скринингтік бағдарламаларды кеңейту, ерте диагностика мүмкіндіктерін арттыру және заманауи емдеу тәсілдеріне қолжетімділікті жақсарту жөнінде ортақ ұстаным білдірді.

Көшбасшылар сондай-ақ Африкадағы Эбола вирусының таралу қаупіне алаңдаушылық танытты. Атап айтқанда, Конго Демократиялық Республикасы мен Угандадағы эпидемиологиялық ахуалға байланысты халықаралық қауымдастықтың үйлестірілген әрекеттері қажет екені айтылды. G7 мемлекеттері індеттің таралуына жол бермеу үшін медициналық және гуманитарлық ресурстарды жұмылдыруға дайын екендерін мәлімдеді.

Саммит аясында қабылданған үшінші құжат халықаралық серіктестікті кеңейтуге арналды. G7 елдері Кения және Оңтүстік Кореямен бірге даму жобаларын қаржыландыру, инвестиция тарту және экономикалық ынтымақтастықты дамыту бағытындағы жұмыстарды жалғастыруға уағдаласты.

Сонымен қатар француз дипломатиялық дереккөздерінің мәліметінше, саммит барысында Ресейге қарсы санкциялық қысымды күшейту мәселесі де талқыланған. Тараптар Ресейдің қазба отын секторына қатысты шектеу шараларын кеңейту және Украинаға әуе қорғанысы жүйелерін жеткізу жөнінде ортақ ұстанымға келген.

Сарапшылардың пікірінше, G7 саммитінде қабылданған шешімдер жаһандық денсаулық сақтау, халықаралық қауіпсіздік және экономикалық әріптестік салаларындағы ынтымақтастықты нығайтуға бағытталған маңызды қадам болып саналады.