Алматыда өтетін «Қайрат» пен әйгілі «Реал Мадрид» клубының арасындағы жолдастық матчқа билеттер рекордтық қысқа уақыт ішінде – бар болғаны 41 минутта түгел сатылып кетті.

Матч 30 қыркүйек күні сағат 21:45-те Алматыдағы Орталық стадионда өтеді. Ойынның ауқымы мен маңыздылығы соншалық, билеттерді тек қазақстандықтар ғана емес, әлемнің түкпір-түкпіріндегі футбол жанкүйерлері сатып алуға тырысқан.

Билеттердің бағасы 30 мың теңгеден бастап 250 мың теңгеге дейін жеткенімен, сатылым ашылған сәттен бастап санаулы минуттар ішінде барлық орындар брондалып, жанкүйерлер онлайн кезекке тұруға мәжбүр болды. Әлеуметтік желілерде кейбір қолданушылар онлайн кезекте 100 мыңнан астам адам болғанын айтып, жүйенің жұмысын сынға алды.

Еске салайық, Орталық стадионның жалпы сыйымдылығы – 23 804 көрермен. Бұл көрсеткіштен бірнеше есе көп жанкүйер билеттің жетіспеушілігінен матчты тек экраннан көруге мәжбүр.

Билеттер тек «Қайрат» клубының ресми алаңдарында сатылды:

• Qairat SuperApp мобильді қосымшасы,

• Қайраттың ресми сайты,

• Ticketon.kz,

• Freedom SuperApp қосымшасы.

Бұл кездесу – «Қайрат» үшін ғана емес, жалпы қазақстандық футбол үшін үлкен тарихи сәт болғалы тұр. Әлемнің ең үздік клубтарының бірі саналатын «Реал Мадридтің» Алматыға келуі – еліміздің футбол саласындағы беделінің өскенін көрсететін маңызды оқиға.