Қазақстан Марокко Корольдігіне астықтың бірінші партиясын теміржол арқылы жөнелтті, деп хабарлады «ҚТЖ» АҚ баспасөз қызметі.

Жаңа-Есіл (Ақмола бөлімшесі) және Сарыкөл (Қостанай бөлімшесі) станцияларынан қазақстандық астықтың бірінші партиясы Марокко Корольдігіне жөнелтілді. 

Көлемі 105 астық таситын жүк вагоны Латвия аумағы арқылы теміржол көлігімен жүріп өтеді. Лиепая портында астық теңіз кемелеріне тиеліп, Солтүстік Африка жағалауына жеткізіледі.

ҚТЖ тасымалдау өтінімдерін жедел өңдейді және логистиканы қамтамасыз етеді.

Осы бағытта еліміздің солтүстік өңірінде өндірілген астық тиелген 17 теміржол құрамын жөнелту жоспарланған. Астықтың жалпы көлемі 60 мың тоннаны құрайды.