Шымкент Санитарлық-эпидемиологиялық бақылау департаменті басшысы маманды жұмысқа орналастыру мақсатында пара алғаны үшін сотталды. Пара берген азамат та жауапқа тартылды.

Брифинг барысында Антикор өкілі Данияр Бекайдаров Шымкент қалалық Санитарлық-эпидемиологиялық бақылау департаментінің басшысы Әбдіманап Төлебаев алты жылға бас бостандығынан айырылғанын айтты.

Үкімді Шымкентте қылмыстық істер жөніндегі ауданаралық сот шығарған. Одан бөлек, іске қатысы бар басқа да азаматтар сотталған. Оларға мемлекеттік лауазымда қызмет етуге өмір бойына тыйым салынып, 42 млн теңге айыппұл бекітілді.

Департаменттегі қызметкерлерді басқару қызметінің басшысы Тұрсынбаеваға 21 млн теңге көлеміндегі айыппұл салынды. Ал Шымкент қалалық көліктегі санитарлық-эпидемиологиялық бақылау басқармасының басшысы Махатова 9 млн теңге, пара берген Әшірбаева 12 млн теңге айыппұл арқалады, – деді Сыбайлас жемқорлыққа қарсы агенттік өкілі.

Бекайдаров аталған тұлғалар 600 мың теңге көлеміндегі параны бергені, алғаны және арада делдал болғаны үшін кінәлі деп танылғанын алға тартты. Бұл қаражат департаменттің аудандық басқармасына бас маман қызметіне орналасу үшін берілген.