CNBC телеарнасының хабарламасына сенсек, Tesla 2024 жылы 5,14 миллион электр көлігіне қатысты 16 рет кері шақырту жариялаған.

10 қаңтар күні таратылған құжаттарға сәйкес, Tesla артқы көрініс камераларының істен шығуына әкелуі мүмкін мәселелерге байланысты АҚШ-тағы 239 000-ға жуық электр көлігін өз еркімен кері қайтарады.

Tesla АҚШ-тың федералды реттеуші органдарына жазған хатында: «Бейнені көрсетпейтін артқы көрініс камерасы жүргізушінің артқы көрінісін шектеп, соқтығысу қаупін арттырады», – делінген.

 2024-2025 жылғы Tesla Model 3 және Model S седандарына және 2023-2025 жылы шығарылған Model X және Model Y жол талғамайтын көліктері кері қайтарылды. Сондай-ақ компания растау электронды хатында көлік камераларына қатысты кейбір мәселелерді шешуі мүмкін «сымсыз желінің (OTA) бағдарламалық құралын жаңартуды ақысыз тарататынын» жариялады.

Ақаулықтары түзетілген көліктер иелеріне қайтарылып беріледі және бұл нарықтағы Tesla-ның жағдайына кері әсер етпейді деп болжануда.

Ұлттық жол қозғалысы қауіпсіздігі басқармасының (NHTSA) мәліметтері бойынша, Tesla 2024 жылы АҚШ-та 5,14 миллион электр көлігіне қатысты 16 рет кері шақырту жасады. Кері қайтарып алу шаралары бағдарламалық қамтамасыз етудің эфирлік жаңартулары мен бөлшектерді ауыстыру комбинациясын қамтыды. Өткен жылы кері қайтарып алулардың 40%-дан астамы компанияның 2023 жылдың аяғында тұтынушыларға сатыла бастаған ең жаңа көлігі Cybertruck-қа қатысты болған.

Соңғы қайтарып алуға қатысты компания 887 кепілдік шағымдар мен ондаған есептер алғанын айтқан. Бірақ Tesla өкілдері NHTSA-ға артқы көрініс камерасының ақаулығынан болған жарақаттар, өлім немесе басқа апаттар туралы хабарлар алмағанын жеткізген.