АҚШ-тың мемлекеттік қарызы 2025 жылдың 14-23 қаңтары аралығында шекті деңгейге жетеді. Осыған байланысты елдің қаржы министрлігі дефолттың алдын алу үшін шұғыл шаралар қабылдауға мәжбүр болады. Бұл туралы АҚШ-тың қаржы министрі Джанет Йелленнің Конгресс басшылығына жолдаған хатында айтылған.

"2025 жылдың 2 қаңтарынан бастап жаңа қарыз лимиті алдыңғы күннің соңындағы заңмен белгіленген шектеулерді ескере отырып, өтелмеген қарыздың көлеміне тең болып белгіленеді", – делінген құжатта.

Йелленнің айтуынша, қазіргі уақытта АҚШ-та қарыз деңгейінің уақытша төмендеуі болжанып отыр. Осыған сәйкес, қаржы министрлігі 2 қаңтарда шұғыл шаралар қабылдау қажет болмайды деп есептейді.

Министрліктің болжамдары бойынша, жаңа лимит 14-23 қаңтар аралығында жетеді. Йеллен Конгреске елдің төлем қабілеттілігін қорғау үшін "барлық қажетті шараларды қабылдауға" шақырды. Қазіргі уақытта АҚШ-тың мемлекеттік қарызы шамамен 36,2 триллион долларды құрайды.