Қазақстанда алғаш рет карбамид өндіретін ірі химия кешені бой көтереді. Үкімет Маңғыстау облысында аммиак-карбамид зауытын салуға қатысты инвестициялық келісімді мақұлдады.

Жобаның жалпы құны 804,2 млрд теңгені құрайды.

Премьер-министр Олжас Бектенов қол қойған қаулыға сәйкес, жоба Ақтау қаласында жүзеге асырылады. Бұл бастама Мемлекет басшысы Қасым-Жомарт Тоқаевтың химия өнеркәсібін дамыту және өндірілетін өнім түрлерін әртараптандыру жөніндегі тапсырмалары аясында қолға алынып отыр.

Жобаны «KazAzot PRIME» жауапкершілігі шектеулі серіктестігі жүзеге асырады. Кәсіпорынды пайдалануға беру 2030 жылға жоспарланған. Құрылыс кезеңінде шамамен 1,5 мың адам жұмыспен қамтылса, зауыт толық іске қосылғаннан кейін 700 тұрақты жұмыс орны ашылады.

Болашақ өндіріс кешенінің қуаты жылына 660 мың тонна аммиак, 580 мың тоннаға жуық карбамид және 500 мың тонна аммиак селитрасын шығаруға мүмкіндік береді. Бұл өнімдер ауыл шаруашылығы саласы үшін аса маңызды саналады.

Қазіргі таңда Қазақстанда карбамид өндірілмейді. Елдегі ауыл шаруашылығы кәсіпорындары бұл өнімді негізінен шетелден импорттайды. Азотты тыңайтқыш ретінде кеңінен қолданылатын карбамид егін өнімділігін арттыруда маңызды рөл атқарады. Сондықтан жаңа зауыттың іске қосылуы ішкі нарықты отандық өніммен қамтамасыз етіп, импортқа тәуелділікті азайтуға жол ашады.

Үкіметтің мәліметінше, жоба агрохимия саласының дамуына серпін беріп қана қоймай, экспорттық әлеуетті де арттырады. Болашақта өндірілген өнімнің бір бөлігі сыртқы нарықтарға жөнелтілуі мүмкін.

Қазір Қазақстандағы азотты тыңайтқыштардың жалғыз өндірушісі – ҚазАзот. Сонымен қатар елде карбамид өндіруге бағытталған тағы екі ірі жоба жоспарланып отыр. Олар жүзеге асқан жағдайда Қазақстанның тыңайтқыш өндірісі айтарлықтай ұлғаяды.

Сарапшылардың болжамынша, барлық инвестициялық жобалар толық іске қосылғаннан кейін 2030 жылға қарай еліміздегі аммиак өндірісі 2,3 млн тоннаға дейін жетуі мүмкін. Бұл Қазақстанға ішкі сұранысты толық қамтамасыз етіп қана қоймай, өңірлік нарықтағы ірі экспорттаушылардың біріне айналуға мүмкіндік береді.