Apple Inc. америкалық Intel Corp. компаниясынан серіктестік және инвестиция салу туралы ұсыныс алған болуы мүмкін.

Бұл туралы Bloomberg агенттігі өз дереккөздеріне сілтеме жасап хабарлады.

Ақпаратқа сәйкес, тараптар арасындағы келіссөздер әлі бастапқы кезеңде және нақты шешім қабылданбаған. Сонымен қатар, Intel басқа да ірі инвесторлармен келіссөздер жүргізіп жатқаны белгілі болды.

Intel және Apple компаниялары бұл ақпаратқа қатысты ресми түсініктеме берген жоқ.

Apple ұзақ уақыт бойы өз компьютерлерінде Intel процессорларын қолданған. Алайда 2020 жылдан бастап компания өз өндірісіндегі чиптерге (Apple Silicon) көше бастады. Бұған дейін, 2019 жылы, Apple Intel-дің модемдік чиптер өндіретін бөлімшесінің көп бөлігін сатып алған болатын.

Bloomberg-тің жазуынша, бұл әріптестіктің жалғасуы немесе жаңа бағыттағы серіктестік болуы мүмкін.

Соңғы аптада Intel-ге қызығушылық танытқан басқа да ірі инвесторлар байқалды:

• Nvidia Corp. бәсекелесіне 5 миллиард доллар көлемінде инвестиция салатынын хабарлады;

• АҚШ үкіметі Intel акцияларының 10%-ын сатып алғаны белгілі болды;

• Жапониялық SoftBank Group компаниясы Intel-ге 2 миллиард доллар инвестиция салды.

Осы жаңалықтардың аясында Intel акциялары сәрсенбі күні 6,4% өсіп, қосымша сессияда тағы 2,2% жоғарылады. Тамыз айының басынан бері компанияның нарықтық капитализациясы 60%-дан астам өскен.