Ұлттық банк төрағасы Тимур Сүлейменов Базалық мөлшерлемені 14,25%-ке дейін төмендетуге арналған брифинг барысында банктерге арналған салықты көтеру туралы пікір білдірді, деп хабарлайды 7kun.kz.

Ұлттық банк басшысның айтуынша, банк секторы басқа салалардан, атап айтқанда, ойын бизнесінен айтарлықтай ерекшеленеді.

«Біз банктер мен ойын бизнесі кірістілігі бойынша бірдей деп санамаймыз - бұл мүлде олай емес. Банктер - бұл жоғары деңгейде реттелетін ұйымдар, бізде 20 миллион адамға бар болғаны 21 банк бар. Олар іс жүзінде «лупа» арқылы реттеледі. Сондықтан олардың барлық кірістері, шығыстары, капиталы екі реттеушінің қатаң назарында: Қаржы нарығын реттеу және дамыту агенттігі мен біздің. Айқындылық бойынша бұл мүлдем бөлек салалар. Банктер - кез келген экономиканың қан айналым жүйесі», - деп түсіндірді ол.

Сүлейменовтың айтуынша, банктік саланың экономикалық жүйедегі пайдасын, жүйелілігін және маңыздылығын ескере отырып, олар да басқа салалар сияқты салық режимінде болуы керек.

«Егер Үкімет пен Парламент жалпы корпоративтік табыс салығы (КТС) 25 пайызға өсетінін айтатын болса, онда банктер де соған кіреді, өйткені бұл жүйелі «көлденең» шешім (...) Өткен жылдар банктер үшін шынымен жақсы болды, өйткені негізгі сыйақы жоғары болды. Бірақ сыйақы төмендейді, ол мәңгі жоғары болмайды, ал банктің кірісі қандай болатынын болашақ көрсетеді», - деді Ұлттық банк басшысы.

Сүлейменов Ұлттық банк үкіметпен белсенді жұмыс жасайтынын, салық саясатын әзірлеу кезінде банк секторының ерекшелігін ескерудің маңыздылығын жеткізуге тырысатынын атап өтті.

«Біз үкіметпен сөйлесіп жатырмыз, онда бәрін адекватты түрде қабылдайды. Соңғы шешім жоқ. Біздің ұстанымымыз түсінікті, айқын және дәйекті: банктер негізгі экономикамен бірдей салық режимінде болуы керек», - деп түйіндеді ол.