Қазақстанда 1 шілдеден бастап тауарлық газдың орташа бағасы 33 пайызға өседі.

Бұл туралы Орталық коммуникациялар қызметінде өткен брифингте ҚР Энергетика вице-министрі Қайырхан Тұтқышбаев мәлімдеді. Вице-министрдің айтуынша, биылғы жылдың алғашқы төрт айында Теңіз және басқа да бірқатар кен орындарында болған техникалық ақауларға байланысты газ өндіру көлемі төмендеген.

Соған қарамастан, ел тұрғындарын газбен қамтамасыз етуге қатысты қиындықтар туындамаған. Өйткені ұлттық оператор QazaqGaz тұтыну көлемін транзиттік газ есебінен толықтырған.

Қайырхан Тұтқышбаев газ бағасының өсуі алдағы жылыту маусымына дайындық жұмыстарын уақытылы жүргізу және газ инфрақұрылымын жаңғырту үшін қажет екенін атап өтті.

«Қосымша күрт қымбаттау күтілмейді», – деді вице-министр. Осылайша, 1 шілдеден бастап газ бағасы көтерілгенімен, билік өкілдері халықты көгілдір отынмен қамтамасыз етуде ешқандай іркіліс болмайтынын мәлімдеп отыр.

Сарапшылардың пікірінше, тарифтердің кезең-кезеңімен өсуі газ тасымалдау желілерін жаңартуға және энергетикалық инфрақұрылымның тұрақты жұмысын қамтамасыз етуге мүмкіндік береді.