Мемлекет басшысы Қасым-Жомарт Тоқаев «Алтын сапа» мен «Парыз» сыйлығының лауреаттары, сондай-ақ «Қазақстанның үздік тауары» көрме-конкурсының жеңімпаздарын марапаттау рәсімінде сөз сөйледі.

Президенттің айтуынша, биылдан бастап 29 қазан ресми түрде «Қазақстан кәсіпкерлері күні» болып бекітілді. Сонымен қатар, жоғары әлеуметтік жауапкершілік танытып, қайырымдылыққа үлес қосқан үздік кәсіпкерлерге арналған жаңа марапат – «Мейірім» ордені енгізілді. Келесі жылдан бастап залда отырған бірқатар кәсіпкер осы орденмен марапатталмақ.

Тоқаев кәсіпкерлердің сапалы өнім өндіріп, экономиканы дамытуға және қоғамға қосқан үлесін атап, мемлекет әрдайым қолдау көрсетуге дайын екенін айтты.