Бүгін – Ядролық сынақтарға қарсы халықаралық іс-қимыл күні.

Бұл атаулы күнді БҰҰ Бас Ассамблеясы Қазақстанның бастамасымен бекіткенін Президент Қасым-Жомарт Тоқаев өзінің X парақшасында еске салды.

Мемлекет басшысы Қазақстан халқы атом қаруын сынаудан көп зардап шеккенін атап өтіп, мұндай қасірет қайталанбауы тиіс екенін айтты.

– Біз кейінгі ұрпақтың жарқын болашағы үшін бейбітшілікті нығайтып, халықаралық әріптестікті дамытуымыз қажет. Ядролық қарудан және сынақтардан біржола бас тарту жолында күш салуымыз керек. Бейбітшілік пен қауіпсіздік – бүкіл адамзатқа ортақ ең басты құндылықтар, – деді Президент.