Гонконг әлемде алғаш рет адамдар мен жасанды интеллект агенттерінің бірлесіп жұмыс істеуіне арналған ашық кодты желіні іске қосуды жоспарлап отыр.

Жобаны Hong Kong Generative AI Research and Development Center әзірлеген. Орталық ClawNet платформасының іске қосылғанын жариялады. Бұл жүйе адамдар мен жасанды интеллект агенттері арасындағы өзара әрекеттесуді реттеуге арналған.

ClawNet платформасының негізгі мақсаты – жасанды интеллект жүйелерінің жұмысын нақты алгоритмдер мен қатаң стандарттар аясында жүргізу. Жоба «жасанды интеллектінің әлеуметтік сәйкестігі» тұжырымдамасына негізделген. Соған сәйкес желідегі әрбір AI агентіне жеке атрибуттар мен нақты операциялық шектеулер беріледі.

Жүйе бойынша бағдарламалар тапсырмаларды өздігінен орындап, бір-бірімен әрекеттесе алады. Дегенмен негізгі шешімдерді қабылдау құқығы адамдардың бақылауында қалады. Бұл тәсіл алгоритмдердің әрбір қадамын ашық әрі бақылауға болатын етеді.

Мұндай жүйені әзірлеу қажеттілігі реттеуші органдардың ашық бастапқы коды бар AI құралдарына қатысты бақылауды күшейтуімен байланысты. Билік жасанды интеллект жүйелерінің пайдаланушылардың деректері мен құрылғыларына кең қол жеткізу мүмкіндігіне алаңдаушылық білдіріп отыр.