Қазақстан Ұлттық Банкінің Ақша-кредит саясаты комитеті базалық мөлшерлемені жылдық 16,5% деңгейінде сақтап қалу туралы шешім қабылдады.

Бұл қадам инфляция тәуекелдерінің жоғары болып отырғанына және сыртқы факторлардың қысымына байланысты жасалды.

Шілде айында жылдық инфляция 11,8% деңгейінде тұрақтады. Азық-түлік бағасы өсе берсе, қызмет көрсету саласындағы баға өсімі алғаш рет баяулады. Айлық инфляция 0,7% болып, соңғы онжылдықтағы орташа мәннен жоғары қалыптасты. Халықтың инфляциялық күтулері 14,2%-ға дейін артқан.

Сыртқы жағдайлар да ықпал етуде: әлемдік азық-түлік бағасы өсіп жатыр, ал АҚШ-тағы монетарлық саясаттың жұмсаруы күткендегіден баяу жүреді. Ұлттық банк базалық сценарийде Brent маркалы мұнай бағасын барреліне 60 доллар деңгейінде қарастырған.

Инфляцияның жаңа болжамы нақтыланды:

• 2025 жылы – 11–12,5%,

• 2026 жылы – 9,5–11,5%,

• 2027 жылы – 5,5–7,5%.

Экономика өсімі бойынша да оң өзгерістер бар. 2025 жылы ЖІӨ 5,5–6,5% өседі деп күтілуде, бұл – жоғары инвестициялық белсенділік пен тұтынушылық сұраныстың нәтижесі.

Ұлттық банк алдағы айларда инфляция айтарлықтай төмендемесе, базалық мөлшерлемені қайта көтеру мүмкіндігін жоққа шығармайды. Келесі шешім 10 қазанда жарияланады.