Президент Қасым-Жомарт Тоқаев «Орталық Азия – Еуропа Одағы» саммиті мен «Жаһандық климат сын-қатерлері кезеңіндегі Орталық Азия» халықаралық конференциясына қатысу үшін Самарқанд қаласына келді, деп хабарлады Мемлекет басшысының баспасөз қызметі.
Қазақстан Президентін әуежайда Өзбекстан Премьер-министрі Абдулла Арипов қарсы алған.
Бұған дейін Өзбекстан Президентінің баспасөз қызметі саммит аясында Орталық Азия мемлекеттері мен Еуропалық Одақ арасындағы жан-жақты ынтымақтастық пен өзара іс-қимылдың даму перспективалары талқыланатынын хабарлаған болатын.
Негізгі назар инвестициялық әріптестікті кеңейту мен тауар айналымын ұлғайтуға, инновация, “жасыл” энергетика, кен өндіру өнеркәсібі, ауыл шаруашылығы, көлік, логистика және цифрландыру салаларындағы бірлескен бағдарламалар мен жобаларды ілгерілетуге, сондай-ақ мәдениет, туризм, ғылым, білім беру және басқа да басым бағыттар бойынша белсенді алмасуларды жалғастыруға аударылады.
Делегация басшылары сондай-ақ халықаралық және өңірлік саясаттың өзекті мәселелері бойынша да пікір алмасады.
Саммит Өзбекстан Президенті Шавкат Мирзиеевтің төрағалығымен өтеді. Оған Еуропалық кеңестің Президенті Антониу Кошта, Еуропалық комиссияның Президенті Урсула фон дер Ляйен, Қазақстан Президенті Қасым-Жомарт Тоқаев, Қырғызстан Президенті Садыр Жапаров, Тәжікстан Президенті Эмомали Рахмон және Түрікменстан Президенті Сердар Бердімұхамедов қатысады.
Ақорданың баспасөз қызметінің хабарлауынша бүгін Мемлекет басшысы Қасым-Жомарт Тоқаев Самарқандта Еуропалық Кеңес Президенті Антониу Коштамен және Еуропалық комиссия Президенті Урсула фон дер Ляйенмен кездесу өткізеді.
Ұқсас материалдар
