Атом энергиясы агенттігінің төрағасы Алмасадам Сәтқалиев Қазақстандағы алғашқы атом электр станциясының құрылысы мемлекетаралық несие есебінен қаржыландырылуы мүмкін екенін мәлімдеді.

Оның айтуынша, жоба бойынша консорциум жетекшісі ретінде Росатом таңдалған. Ал қаржыландырудың 85%-ын Ресей несие ретінде беруі ықтимал, қалған 15%-ын Қазақстан Үкіметі қамтамасыз етеді.

Қазіргі уақытта екі негізгі үкіметаралық келісім әзірленуде: бірі – АЭС салу туралы, екіншісі – қаржыландыру шарттарын айқындау жөнінде.

Алдын ала есеп бойынша, қуаты 1200 мегаваттық екі блоктан тұратын станцияның құны шамамен 15 млрд доллар болуы мүмкін. Алайда нақты сома жоба толық пысықталғаннан кейін белгілі болады.

Сәтқалиев сондай-ақ атом энергетикасын дамыту үшін арнайы ұлттық холдинг құру жоспарланып отырғанын айтты. Бұл құрылым АЭС-терді басқару мен сервистік қызмет көрсетуді үйлестірмек.

Еске салсақ, Қазақстанда АЭС салу мәселесі бірнеше жылдан бері талқыланып келеді. Бұған дейін Самұрық-Энерго арқылы жылу электр орталықтарын өз күшімен салу туралы шешім қабылданған еді.

Сарапшылардың пікірінше, АЭС құрылысы елдің энергетикалық қауіпсіздігін арттыруға мүмкіндік береді, алайда қаржыландыру мен тәуелділік мәселелері де назарда болуы тиіс.