Маңғыстау облысында ауқымды кадрлық ауыс-түйіс болды. ҚР Президентінің Жарлығымен Нұрдәулет Игілікұлы Қилыбай Маңғыстау облысының әкімі болып тағайындалды. Ол 2023 жылдың қаңтарынан бері "Өзенмұнайгаз" АҚ басқарма төрағасы қызметін атқарып келген. Оған дейін Маңғыстау облысы әкімінің орынбасары, Ақтау қаласының әкімі болған.

Президент келісімі негізінде бас прокурордың 2024жылғы 17 мамырдағы бұйрығымен 3-сыныпты мемлекеттік әділет кеңесшісі Айдос Серікханұлы Майлыбаев Маңғыстау облысының прокуроры лауазымына тағайындалды.

Жаңа қызметке тағайындалғанға дейін 4 жылдан астам Ақмола облысының прокуроры болды. "Жауынгерлік ерлігі үшін" медалімен және 2-дәрежелі "Айбын" орденімен наградталған, Прокуратура саласының құрметті қызметкері.

Ұлттық қауіпсіздік полковнигі Серік Әміров облыстық ҰҚҚ департаменті басшысы қызметіне тағайындалды. Тағайындау 13 мамыр күні болған.

Сондай-ақ, Маңғыстау облыстық ПД бастығы болып, Павлодар облысы ПД басшысының экс-орынбасары Сағындық Аяғанов тағайындалды. Полиция полковнигі 1997 жылдан бері ІІМ саласында қызмет атқарып келеді.