Премьер-министр Олжас Бектенов Үкімет отырысында тауар өндіру, сату және бақылау жүйесін жетілдіруге бағытталған бірқатар тапсырма берді.

Бірінші тапсырма – тауарларды топтастыруды аяқтау.

Сауда және интеграция министрлігі мен Қаржы министрлігі, өзге де мүдделі мемлекеттік органдармен бірлесіп, 2024 жылдың 1 қазанына дейін тауар, жұмыс және қызмет жүйесіндегі тауарларды топқа бөлуді аяқтауы тиіс. Сонымен қатар, ведомстволық ақпараттық жүйелерді тауарлардың ұлттық каталогімен сапалы интеграциялау үшін тиісті нормативтік-құқықтық актілерге талдау жүргізіп, оларды жаңарту қажет.

Екінші тапсырма – цифрлық азық-түлік ваучерін енгізу.

Әлеуметтік маңызы бар азық-түліктің сауда үстемесіне бақылауды күшейту үшін Сауда және интеграция министрлігі 1 қазанға дейін Көкшетау мен Павлодарда цифрлық азық-түлік ваучерінің пилоттық жобасын іске қосады.

Бұл жұмыстардың орындалуын үйлестіру мен бақылау вице-премьер Серік Жұманғаринге жүктелді.

Бұған дейін Үкімет басшысы тауарды таңбалау жүйесінің маңыздылығын кәсіпкерлерге түсіндіру жұмыстары жеткіліксіз екенін айтып, тауарларды өндіру мен өткізуді толық қадағалайтын ұлттық каталогты жедел енгізуді тапсырған болатын.