Бүгін президент Қасым-Жомарт Тоқаев Ақордада салтанатты жиын өткізіп, энергетика саласы қызметкерлерін кәсіби мерекесімен құттықтады.

Бұл туралы Ақорданың баспасөз қызметі хабарлады.

 Мемлекет басшысы өз сөзінде: «Энергетика саласы – еліміз үшін стратегиялық маңызы бар сала. Тұрақты қуат көзі болмаса, қуатты мемлекет құру мүмкін емес. Энергетика саласында қызмет ету – еліміздің дамуына үлес қосу деген сөз. Себебі сіздер атқарып жатқан жұмыстың игілігін еліміздегі әр отбасы, әр адам көреді. Әрбір үйге жарық пен жылу беру – жауапкершілігі зор жұмыс. Қажырлы еңбектеріңіз үшін баршаңызға шынайы ризашылығымды білдіремін», – деді Президент.


Сондай-ақ, ол электр қуаты қауіпсіздік мәселесі екенін атап өтіп, оны басқа елдерден сатып алмау керектігін тілге тиек етті.

«Түптеп келгенде, бұл – ұлттық қауіпсіздік мәселесі. Бұдан бөлек, еліміздің зор энергетикалық мүмкіндігін тиімді қолдану қажет. Мысалы, Қазақстан – көмірге бай ел. Жыл сайын 110 миллион тоннадан астам көмір өндіріледі. Осы стратегиялық артықшылықты дұрыс пайдаланған жөн», – деді.

Тоқаев «таза көмір» технологиясына тезірек көшу керек деген тапсырмасын орындау тым созылып кеткенін айтып, ескерту жасады.

«Біз заманауи үлгідегі «таза көмір» технологиясына тезірек көшуіміз керек. Сол арқылы көмір станцияларының тиімділігін арттыра түсеміз. Бұдан бөлек, Курчатов қаласында жылу электр станциясын, Көкшетау, Семей, Өскемен қалаларында жылу электр орталықтарын салу қажет. Осы нысандардың барлығына «таза көмір» технологиясын енгізу керек. Шындығын айтсақ, бұл жобалардың жүзеге асуы әбден созылып кетті. Енді ары қарай күтуге болмайды, – деді президент.