АҚШ президенті Джо Байденнің әкімшілігі қытайлық тауарларға, оның ішінде электромобильдер, жартылай өткізгіш бөлшектер, аккумуляторлар, күн батареялары және минералды шикізатты импорттауға баж салығын арттыратынын хабарлады.

2024-2026 жж. аралығында алымды арттыру Қытайдың жылына шамамен 18 миллиард долларлық экспортына әсер етеді, деп жазылған Ақ үй хабарламасында.

Ең жоғары өсім Қытайдың электромобильдеріне қатысты. Биыл оларды АҚШ-қа әкелу алымы 4 есеге артады, қазіргі 25 пайыздан 100 пайызға дейін өседі. Жартылай өткізгіш компоненттеріне тарифтер 2025 жылдан бастап 25%-дан 50%-ға дейін көтеріледі.

Вашингтон Қытайдан электр көліктерге арналған литий-ионды аккумуляторлар импортына тарифтерді биыл 7,5%-дан 25%-ға дейін көтереді. Ал басқа мақсаттарға арналған литий-ионды аккумуляторларға тарифтер 2026 жылы дәл осы көлемде көтеріледі.

Табиғи графит үшін баж салығы 2026 жылы нөлден 25%-ға дейін, минералды шикізаттың бірқатар басқа түрлері және күн батареялары үшін– биыл 25%-дан 50%-ға дейін көтеріледі.

Сонымен қатар, контейнерлік айлақ крандары мен медициналық бұйымдардың жекелеген түрлеріне, оның ішінде жеке қорғаныс құралдарына баж салығы көтеріледі деп күтілуде.

Қытайдан болат пен алюминий өнімдерін жеткізуге арналған баж салығы ағымдағы жылы 0-7,5%-дан 25%-ға дейін көтеріледі.

«Бұл шаралар Байден әкімшілігінің жұмыс орындарын құруға бағытталған тарихи инвестицияларының Қытайдан келетін әділетсіз арзан қытай тауарларының ағыны арқылы бұзылмауын қамтамасыз етеді», - деді Ұлттық экономикалық кеңестің (NEC) басшысы Лейл Брейнард.