Қазақстан Орталық Азиядағы полимер өнімдерін өндірудегі көшбасшы елге айналуға бет алды.

Бұл туралы ҚР Премьер-Министрі Олжас Бектенов Kazakhstan Energy Week – 2025 және XVI Еуразиялық KAZENERGY форумы аясында сөйлеген сөзінде мәлімдеді.

Үкімет басшысы өз сөзінде еліміздің энергетикалық қауіпсіздігін қамтамасыз ету және шетелдік инвестицияларды тарту бағытында нақты қадамдар жасалып жатқанын атап өтті.

«Президент Қасым-Жомарт Тоқаев атап өткендей, Қазақстан энергиямен өзін-өзі толық қамтамасыз етуді мақсат етіп отыр. Бұл жолда көптеген ірі жобалар халықаралық серіктестермен бірге жүзеге асырылуда. KAZENERGY форумы 16 жылдан бері осы бағыттағы маңызды диалог алаңына айналды», – деді Бектенов.

Оның айтуынша, Қазақстан қазіргі уақытта экспорттық-шикізат моделінен бас тартып, жоғары технологиялық өңдеу кластерін дамытуға ден қойып отыр.

Ірі жобалар және нақты нәтижелер:

       * Жалпы қуаты 500 мың тонна болатын полипропилен зауыты іске қосылды

• Жылына 1,25 млн тонна полиэтилен өндіретін жоба жүзеге асырылуда

• Бұл Қазақстанды Орталық Азиядағы ең ірі полимер өндіруші мемлекетке айналдырады

• Бұдан бөлек бутадиен мен карбамид өндірісі бойынша жобалар қолға алынған

«2030 жылға дейін құны 15 млрд АҚШ долларынан асатын 6 ірі жобаны іске асыру жоспарланған. Бұл мұнай-газ химиясы өндірісін ұлғайтып, он мыңдаған жаңа жұмыс орнын ашады», – деді Үкімет басшысы.

Қазақстан – ашықтық пен технологиялық жаңғыру жолында

Олжас Бектенов еліміздің энергетикалық саясатында ашықтық, тұрақтылық және технологиялық даму қағидаттары басшылыққа алынатынын атап өтті. Қазақстан Үкіметі бизнесті тұрақты энергетикалық болашақты бірлесіп құруға шақырды.

«Бізде бай табиғи ресурстар, стратегиялық минералдар, Еуропа мен Азияны жалғайтын көлік-логистикалық дәліздер мен білікті мамандар бар», – деді Премьер-Министр.