2025 жылдың 2 желтоқсанынан бастап Қазақстанда тұрғын үй көмегін есептеудің жаңа қағидалары қолданысқа енгізіледі.

Өзгерістер Индустрия және құрылыс министрінің бұйрығымен бекітілді.

Министрліктің мәліметінше, жаңартылған ережелер коммуналдық қызметтерді тұтыну нормаларын қайта қарауды қамтиды. Дәл осы нормалар отбасының тұрғын үй көмегіне құқығы мен оның мөлшерін есептеудің негізгі көрсеткіші саналады. Құжатта жаңа нормалар есептеулерді ашық жүргізуге және нақты тұтынуға сәйкестендіруге бағытталғаны атап өтілген. Бұл әсіресе климаттық және инфрақұрылымдық жүктемесі әртүрлі өңірлер үшін маңызды.

Газбен қамту:

• Көпқабатты үйлер – адам басына 15 м³ дейін;

• Жеке үйлер – үйді жылытуға 1 м²-ге 15 м³ дейін (жаңа норма).

Жылумен қамту:

• Есептегіші бар үйлер – айына 1 м²-ге 0,025 Гкал дейін;

• Есептегішсіз үйлер – нормаларды жергілікті әкімдіктер анықтайды.

Электр энергиясы:

• Есеп айырысу жергілікті табиғи монополияларды реттейтін органдар бекіткен нормативтер арқылы жүргізіледі.

Сумен жабдықтау:

• Суық су – адам басына 4 м³ дейін;

• Ыстық су – адам басына 2 м³ дейін.

Қоқыс шығару:

• Адам басына 650 теңгеден аспайды.

Лифт қызметі:

• Пәтерге 1300 теңгеге дейін.

Байланыс:

• Телефонның абоненттік төлемі 1399 теңгеден аспайды.

Мемлекеттік тұрғын үйді жалға алу:

• 1 м² үшін 120 теңгеден аспайды.

Тұрғын үй нормасы:

• Отбасы мүшесіне – 18 м²;

• Жалғыз тұратын азаматқа – 30 м²-ге дейін, бірақ нақты тұратын аумақтан артық емес.

Министрлік жаңартылған нормалар тұрғын үй көмегін әр өңірдің жағдайын ескере отырып, әділ және дәл есептеуге мүмкіндік беретінін атап өтті.