ҚР Көлік министрі Нұрлан Сауранбаев Үкімет отырысында елдегі көлік саласының дамуы туралы мәлімдеді.

Биылғы 10 айда көлік қызметтерінің көлемі 20,7%-ға өскен.

Министрдің айтуынша, көлік саласы қазіргі таңда экономиканың өсу драйверлерінің біріне айналып отыр. Сонымен қатар негізгі капиталға салынған инвестициялар 18,4%-ға артқан. Ал транзиттік жүктердің көлемі 29,4 млн тоннаға жетіп, 5%-дық өсу байқалған.

Автокөлікпен жүк тасымалдау көлемі 288 млн тоннаны құрап, өткен жылмен салыстырғанда 1,7%-ға көбейген. Министр сондай-ақ автоматтандырылған өлшеу стансаларының заңбұзушылықтарды анықтау мен бюджетке түсетін кірісті 10 есеге арттырғанын атап өтті.

Бас прокуратурамен бірлесіп жүргізілген интеграция нәтижесінде биылғы 5 айда 10 мыңнан астам айыппұл ұйғарымдары рәсімделген. Жүктерді автокөлікпен тасымалдау 42 елмен жүзеге асырылуда, ал Қытай мен Өзбекстанға қатысты рұқсат бланкілері электрондық форматқа ауыстырылды.