Қазақстанда өткен жылы 234 852 адам автокөлік сатып алған. Бұл туралы Қазақстан Автокөлік одағы президенті Анар Мақашева мәлімдеді.

Оның айтуынша, 2025 жылғы 1 қазандағы жағдай бойынша елде тіркелген автокөліктер саны 5,9 млн-ға жеткен. Оның ішінде:

• 399,5 мың – 3 жылға дейінгі,

• 1 млн – 3-7 жыл аралығындағы,

• 606,6 мың – 7-10 жыл аралығындағы,

• 1,4 млн – 10-20 жыл аралығындағы,

• 2,4 млн – 20 жылдан асқан көліктер.

Бұл деректер Қазақстанда автопаркті жаңарту әлеуеті әлі де жоғары екенін көрсетеді. Одақ алдағы уақытта елдегі автокөліктерді кезең-кезеңімен жаңарту жоспары бар екенін де атап өтті.

Сонымен қатар, 2024-2025 жылдары автокөлік сатылымы 15%-ға өскен. 2025 жылы 234,9 мың көлік сатылса, 2024 жылы бұл көрсеткіш 205,1 мың болған.

Жаңа автокөлік және автокомпонент өндірісі жобаларының арқасында шамамен 5 мың жаңа жұмыс орны ашылуы мүмкін. 2025 жылы Қазақстанда екі жоғары технологиялық өндіріс іске қосылды: Алматыда Chery, Haval және Changan брендтері шығарылатын мультибрендті зауыт, сондай-ақ Қостанайдағы Kia Qazaqstan зауыты.