Nasdaq Qiwi компаниясының америкалық депозитарлық акцияларын (ADS) делистингке жіберу туралы шешім қабылдады, деп хабарлады  компания 6 қыркүйек, жұма күні АҚШ-тың бағалы қағаздар және биржалар жөніндегі комиссиясына (SEC) жолдаған 25 нысанды ашық ақпаратында.

Ережеге сәйкес, делистинг туралы шешім 25 нысан жарияланғаннан кейін 10 күн өткен соң күшіне енеді.

2023 жылдың наурыз айында Nasdaq Qiwi-ге акцияларын делистингке жіберетіні туралы хабарлаған болатын. Ол кезде компания бұл шешімге шағым түсіріп, листингті сақтап қала алды.

Nasdaq бұл шешімге компанияның өз бизнесін қайта құрылымдау жоспарының әр кезеңін сәтті аяқтап, Qiwi тобын Ресейлік және шетелдік сегменттерге бөлу шартымен келісті. Qiwi үш ай ішінде жоспарда көрсетілген барлық талаптарды орындағанын мәлімдеді. Атап айтқанда, ресейлік активтерді кейіннен сату үшін бағалау жүргізіліп, оларды «Киви» компаниясында біріктіру жұмыстары атқарылды, ал осы жылдың басында сату туралы мәміле жасалды.

Дегенмен, маусым айының соңында Nasdaq листинг ережесінің 5101-бабына сілтеме жасап, Qiwi-ге қайтадан оның ADS-терін делистингке жіберетіні туралы хабарлады. Бұл ереже бойынша, биржа акциялардың бастапқы немесе кейінгі листинг критерийлеріне сәйкес келетініне қарамастан, қандай да бір оқиға олардың листингін қолайсыз немесе негізсіз етеді деп есептесе, делистингке жіберу туралы шешім қабылдауы мүмкін. Компанияға бұл шешімге шағым түсіру үшін 15 күн берілді.

Nasdaq шешімін жариялаған 6 қыркүйек, жұма күні Qiwi ADS-тері Астана халықаралық биржасында (AIX) листингке енгізілгені туралы да белгілі болды. AIX және Nasdaq-пен қатар, американдық депозитарлық акциялар Мәскеу биржасында да листингтен өткен.