Билік
Жаһандық дағдарыс дәуірі: Тоқаев БҰҰ-ны жаңартуға шақырды
Анталияда өткен халықаралық дипломатиялық форумда Қазақстан Президенті Қасым-Жомарт Тоқаев жаһандық қауіпсіздік пен халықаралық қатынастардың өзекті мәселелеріне тоқталып, Түркияның өңірлік және әлемдік саясаттағы рөлі артып келе жатқанын атап өтті.
Анталия дипломатиялық форумы аясындағы «Mapping Tomorrow, Managing Uncertainties» панелдік сессиясында сөз сөйлеген Мемлекет басшысы Түркияның соңғы жылдары халықаралық аренадағы ықпалы айтарлықтай күшейгенін айтты. Оның пікірінше, бұл ең алдымен ел Президенті Режеп Тайип Ердоғанның саяси көшбасшылығымен тікелей байланысты.
Жиынды жүргізген Түркия парламентінің депутаты, бұрынғы сыртқы істер министрі Мевлют Чавушоғлы да өңірлік диалогтың маңызын ерекше атап өтті.
Президент Тоқаев өз сөзінде қазіргі геосаяси жағдайдың күрделеніп бара жатқанын жеткізді. Оның айтуынша, бүгінгі қақтығыстар тек жекелеген өңірлер шеңберінен шығып, жаһандық сипат алып отыр. Бұл жағдай халықаралық қауіпсіздік архитектурасын қайта қарау қажеттігін айқындай түседі.
Мемлекет басшысы жаһандық тұрақтылықты қамтамасыз етудегі Біріккен Ұлттар Ұйымының рөліне ерекше тоқталды. Ол ұйымның баламасы жоқ әмбебап құрылым екенін атап өте отырып, қазіргі жағдайда оны реформалау мәселесі күн тәртібінен түспей отырғанын жеткізді.
– Халықаралық шиеленісті азайту мәселесі әрдайым өзекті. Бүгінде әлем бұрынғыдан да күрделі кезеңді бастан өткеріп отыр. Сондықтан БҰҰ-ны тек қолдап қана қоймай, оның тиімділігін арттыру бағытында нақты қадамдар қажет, – деді Президент.
Сонымен қатар, Қасым-Жомарт Тоқаев алдағы уақытта Режеп Тайип Ердоғанның Қазақстанға жоспарланған мемлекеттік сапарына ерекше мән берілетінін атап өтті. Бұл сапар екіжақты стратегиялық әріптестікті жаңа деңгейге көтеруге ықпал етпек.
Сарапшылардың пікірінше, Анталия форумындағы бұл мәлімдемелер Қазақстанның көпвекторлы сыртқы саясаты мен жаһандық диалогтағы белсенді ұстанымын тағы бір мәрте айқындай түсті.
