Атырау облысында экологиялық заңнаманы бұзған бірқатар ірі кәсіпорынға 2,3 млрд теңгеден астам айыппұл салынды.

Бұл туралы облыстық Табиғи ресурстар және табиғат пайдалануды реттеу басқармасы мәлімдеді.

Басқарманың хабарлауынша, 2025 жылдың қаңтар-тамыз айлары аралығында өңірде экологиялық талаптардың сақталуына байланысты 21 бақылау шарасы жүргізілген. Оның ішінде 7 профилактикалық, 13 жоспардан тыс тексеру және 1 сәйкестікке тексеріс болған.

Тексеріс нәтижесінде 52 заңбұзушылық анықталып, 19 нұсқама берілген. Барлық нұсқамалар орындалып, 121 әкімшілік іс қозғалған. Жалпы сомасы 2 млрд 360 млн теңгеден астам айыппұл салынған.

Басқарма мәліметіне сәйкес, бірнеше ірі кәсіпорынның қоршаған ортаға теріс әсер еткені белгілі болды. Атап айтқанда:

• «ANACO» ЖШС экологиялық рұқсатсыз шығарындылары үшін 897 млн теңге айыппұлға тартылған. Компания сотқа жүгінгенімен, шешім өзгеріссіз қалып, айыппұл өндірілді.

• «Атырау мұнай өңдеу зауыты» ЖШС нормативтен тыс ластаушы заттар шығарғаны үшін 28 млн теңге айыппұл төлейді.

• «Потенциал Ойл» ЖШС – 7,2 млн теңге,

• «Petrocraft» ЖШС – 1,25 млрд теңге көлемінде айыппұл арқалады.

«Барлық заңбұзушылық бойынша кінәлі тұлғалар әкімшілік жауапкершілікке тартылды. Кейбір іс бойынша айыппұл өндіру жұмыстары жалғасуда. Экологиялық бақылау мен мониторинг тұрақты түрде жүргізіліп отырады», – деді Табиғи ресурстар және табиғат пайдалануды реттеу басқармасының өкілдері.