Астанада 2026-2028 жылдарға арналған май өнімдері экспортының даму жөніндегі Жол картасы таныстырылды.
Шараға ауыл шаруашылығы вице-министрі Ермек Кенжеханұлы, мемлекеттік органдар, өңдеуші кәсіпорындар және халықаралық серіктестер қатысты.
Вице-министрдің мәліметінше, соңғы жылдары майлы дақылдар алқабы 3,9 млн гектарға дейін ұлғайып, өңдеу көлемі 700 мың тоннадан асқан. Экспорт 29% өсіп, 582 мың тоннаға жетті. Қолдау шараларының арқасында Қазақстан күнбағыс майын экспорттау бойынша әлемнің үздік ондығына кіріп, ЕО-ға күнбағыс шроты жөнелтуде 3-орынды иеленіп отыр.
Жол картасы ITC, QazTrade және салалық қауымдастықтармен бірлесіп әзірленген. Құжат май өнімдері экспортын 1 млрд долларға дейін ұлғайтуды, өткізу нарықтарын кеңейтуді және терең өңдеуді дамытуды көздейді.
Дөңгелек үстелде мемлекет пен бизнес ынтымақтастығын арттыру үшін арнайы мемлекеттік-жекешелік платформа құру туралы шешім қабылданды.
