Қасым-Жомарт Тоқаев Қазақтелеком АҚ басқарма төрағасы Бағдат Мусинді қабылдап, компанияның соңғы жылдардағы жұмысы мен ірі инфрақұрылымдық жобалары туралы есеп тыңдады.

Кездесу барысында ұлттық байланыс операторының елдегі телекоммуникация саласындағы негізгі бағыттары талқыланды. Қазіргі уақытта компания 1,75 миллионнан астам үй шаруашылығына қызмет көрсетіп отыр. Сонымен қатар республика бойынша талшықты-оптикалық желілерді кеңейту жұмыстары жалғасып, нарықтың негізгі сегменттерінде жетекші позиция сақталған.

Елді мекендерді сапалы байланыспен қамтамасыз ету де негізгі басымдықтардың бірі. Жоспарға сәйкес, 2027 жылдың соңына дейін халқы 1 миллионнан асатын өңірлердегі 3 мыңнан астам ауылға жоғары сапалы байланыс қызметі жеткізіледі.

Президентке «Каспий ТОБЖ» халықаралық жобасының іске асу барысы да таныстырылды. Жоба аясында Ақтау мен Сумгаит арасында суасты талшықты-оптикалық байланыс желісі тартылмақ. Бұл бастама Қазақстанның транзиттік әлеуетін арттырып, Еуропа мен Азия арасындағы цифрлық дәлізді қалыптастыруға мүмкіндік береді.

Сонымен қатар деректерді өңдеу инфрақұрылымын дамыту мәселесі қаралды. Екібастұз қаласында «Деректерді өңдеу орталығы алқабы» жобасы аясында қуаты кезең-кезеңімен артатын заманауи орталық салынып жатыр. Жоба халықаралық технологиялық компанияларды тартуға және елдің инвестициялық тартымдылығын күшейтуге бағытталған.

Бағдат Мусиннің айтуынша, компания қызметінде жасанды интеллект технологияларын енгізу басымдыққа ие. Бұл бағытта корпоративтік процестерді автоматтандыруға арналған ЖИ-агенттер әзірлеу, киберқауіпсіздік жүйелерін жетілдіру және мемлекеттік секторды цифрландыруға арналған жобалар қолға алынған.

Мемлекет басшысы шағын қалалар мен ауылдарды сапалы интернетпен қамтудың маңызын атап өтіп, цифрландыру және жасанды интеллект саласындағы инвестициялық бастамаларды уақытылы жүзеге асыруды тапсырды.