Иран төңірегіндегі қақтығыстың шиеленісуі және Ормуз бұғазы маңындағы танкерлерге жасалған соққылар туралы хабарлар мұнай нарығына әсер етті.

Бүгінгі сауда сессиясы айтарлықтай өсіммен ашылды. ICE Futures Europe биржасында Brent маркалы мұнайдың мамыр айындағы фьючерстері ең жоғары деңгейінде 13 пайыздан астамға өсіп, барреліне 82,37 долларға жетті. Бұл соңғы бір жылдан астам уақыттағы ең жоғары көрсеткіш. Мұндай деңгей соңғы рет 2025 жылдың қаңтарында тіркелген.

Кейін өсім қарқыны біршама баяулап, баға барреліне шамамен 79 доллар деңгейіне дейін төмендеді.

Демалыс күндері мұнай саудасы жүргізілмейтіндіктен, нарық соңғы күндері болған оқиғаларға жаңа сауда аптасының басында ғана әрекет етті.

Ормуз бұғазы ресми түрде жабылған жоқ. Алайда халықаралық агенттіктер бірнеше танкер шабуылға ұшырағанын хабарлады. Сақтандыру компаниялары кейбір тәуекелдерді жабуды тоқтата бастаған, ал ірі мұнай компаниялары мен трейдерлер мұнай, отын және сұйытылған табиғи газды тиеуді уақытша тоқтатқан.

Сондай-ақ бұғаз арқылы кемелердің қозғалысы ондаған пайызға төмендегені айтылды. Кемелерді қадағалау қызметтерінің дерегіне сәйкес, көптеген танкерлер Парсы шығанағы мен Араб теңізі аймағында күтіп тұр.

Сарапшылардың бағалауынша, егер Ормуз бұғазы ресми түрде жабылса, мұнай бағасы барреліне 100 доллардан асып кетуі мүмкін.