Қазақстан мен Ресей шекарасындағы Жансай – Сагарчин өткізу пункті маңында көліктердің ұзын кезегі пайда болды.

Шекара Орынбор облысы бағытына өтетін негізгі өткелдердің бірі саналады. Куәгерлердің айтуынша, қиын жағдай кеше басталған. Жүргізушілердің мәліметінше, күту уақыты алты-жеті сағатқа дейін жеткен. Бейтарап аумақта көлік көп жиналып, ал Қазақстан жағынан шығатын жүк көліктерінің колоннасы шамамен алты шақырымға созылған.

Кейбір жүргізушілердің айтуынша, Тәжікстан азаматтары Ресейге кірер кезде қосымша тексеруден өтеді. Бұл да шекарадан өткізу жылдамдығына әсер етіп отыр.

Әлеуметтік желілерде жүргізушілердің бірі шекараға шамамен сағат 14:00-де келіп, алты сағаттан астам уақыт күткенін жазған. Басқалары түн ортасынан бастап кезекте тұрғанын айтады. Сонымен қатар олар ауа райының қолайсыздығын айтып, суықта ұзақ күтуге тура келетіндіктен балалармен жолға шықпауға кеңес беруде.

Әзірге кідірістің нақты себебі мен қозғалыстың қашан қалыпқа келетіні туралы ресми ақпарат жарияланған жоқ.