Нұрлыбек Нәлібаев Отто Иван Ронамен кездесіп, аймаққа инвестиция тарту мәселесін талқылады.

Кездесуде мажарлық UBM Group компаниясы жобаның екінші кезеңі аясында Қазақстанда тағы екі құрама жем зауытын салуға ниетті екенін растады. Жаңа өндіріс орындарын орналастыру үшін Қызылорда облысы негізгі нұсқа ретінде қарастырылып отыр.

Облыс әкімі өңірде күріш, мал және құс шаруашылығы қарқынды дамып келе жатқанын атап өтіп, бұл құрама жемге сұранысты арттырып отырғанын айтты.

Айта кетейік, бұған дейін компания өкілдері Қазақстан Республикасы Сыртқы істер министрлігі және Kazakh Invest құрылымдарымен келіссөз жүргізген.

Сондай-ақ елші Байқоңыр ғарыш кешеніне сапары ерекше әсер қалдырғанын айтып, инвестициялық ынтымақтастықты тереңдетуге дайын екенін жеткізді.