Алматы қаласының әкімі Дархан Сатыбалды отандық және шетелдік инвесторлардың қатысуымен инвестициялық штаб отырысын өткізді.

Жиын барысында қаланың экономикалық дамуына серпін беретін 8 жоба талқыланды.

Ұсынылған жобалар фармацевтика, құрылыс, туризм, тұтыну тауарлары өндірісі, сондай-ақ ақпараттық технологиялар мен цифрландыру салаларын қамтиды.

Қала әкімі индустриялық аймақтарда жүзеге асырылатын жобаларды іріктеу кезінде келесі талаптарға ерекше назар аударылуы тиіс екенін атап өтті:

• жоғары қосылған құнға ие болуы,

• экспорттық әлеуетінің болуы,

• инновациялық технологияларды енгізуі.

«Әрбір инвестициялық жоба Алматыға тек экономикалық пайда ғана емес, нақты әлеуметтік нәтиже әкелуі тиіс. Бұл – өндірістің дамуы, салық түсімдерінің артуы және жаңа жұмыс орындарының ашылуы. Біздің басты мақсатымыз – берілген әрбір жер учаскесі қаланың және оның тұрғындарының игілігі үшін жұмыс істеуі», – деді Дархан Сатыбалды.

Жоба аясында әкімдік инвесторлармен ашық әрі тиімді әріптестік құруға дайын екенін білдірді. Отырыста қаралған бастамалар алдағы уақытта Алматы қаласының экономикалық өсімінің жаңа драйверлеріне айналуы мүмкін.